The True Color of Humanity

 Yeh story India ke religions par based hai. Aaj hum ek aise topic par baat karenge jo aapko sochne par majboor kar dega, aur jo aaj ke time par discuss karna bahut zaruri hai. Aaj kal hum news me dekhte hain ki Hindu-Muslim hatred apne peak par pahunch chuka hai, aur iska koi solution bhi hame nahi pata.

Main ek example ke through kuch samjhata hoon. By chance agar ek Muslim bacha galti se Hindu family me chala gaya aur waha bada hua, toh jaahir si baat hai ki jo Hindu parents usse sikhaenge, wahi uska belief banega, wah bhagwan ki pooja karega. Ab socho agar ek Hindu bacha galti se Muslim family me chala gaya, toh kya usse pata chalega ki woh Hindu hai? Nahi! Woh wahi beliefs apnayega jo uske Muslim parents usse sikhayenge.

Ab ek aur angle se sochte hain—agar us bache ke parents atheist hote, toh woh kisi bhi religion ko nahi manta. Aur agar puri duniya mein sab atheist hote, toh religion hota hi nahi, aur dharm ke naam par log ladte bhi nahi. God ko maanna ya na maanna ek personal belief hai. Koi Bhagwan ko manega, koi Allah ko, aur koi kisi ko bhi nahi manega. Iska matlab yeh thodi hai ki insan alag ho gaya.

Ab socho, ek Hindu aur ek Muslim ko ek saath khada rakho. Agar dono ka blood collect kiya jaye, toh kya Hindu ka blood yellow aur Muslim ka blue hoga? Bilkul nahi! Sabka blood red hota hai. Jab koi blood ki zarurat mein hota hai, toh koi yeh nahi kehta ki "mujhe sirf Hindu blood chahiye" ya "Muslim blood chahiye." Sirf ek kind-hearted person ki zarurat hoti hai jo blood donate kare.

Aaj kal news aati hai ki masjid todkar mandir banayi jayegi ya mandir todkar masjid banayi jayegi, kyunki purane zamane mein waha dusra structure tha. Raja-Maharaja ke time yeh sab common tha—agar Muslim king jeet gaya toh Hindu structures ko todkar apne pasand ke banwa leta tha, aur agar Hindu king jeet gaya toh wah wahi Muslim structures ke saath karta. Par kya yeh ladayi-jhagde ka solution hai?

Aaj hum ek democratic desh hain. India mein itne saare mandir, masjid, church, gurudwara aur agiary hain jo enough hain sabko pray karne ke liye. Toh phir kyun hum history ke naam par aapas mein ladte hain?

Ab log kehte hain ki Hindu belongs to Hindustan, Muslim belongs to Pakistan. Instead, hum yeh sochna chahiye ki God ne zameen sab humans ke liye banayi hai. God ne countries aur unke borders nahi banaye; yeh toh humans ne decide kiya hai. God ke nazariye se dekho, toh puri duniya ek plain land hai jaha log rehte hain.

Sochne ki baat yeh hai ki agar Muslim family kisi Hindu festival par gift de aur Hindu family Ramadan ke time kuch special gift kare, toh ek dusre ke saath pyaar aur respect badhega. Aur isi tarah Christians, Parsis aur Sikhs ke festivals par bhi ek dusre ko gifts dekar yeh tradition banaya jaye.

Yeh chhoti si baat India aur duniya me shanti banaye rakhne ke liye bahut zaruri hai.

Aap kya kar sakte ho?
Ek moment ke liye socho—kya aap kisi apne friend ya padosi ke saath ek chhoti si gesture kar ke harmony create kar sakte ho? Kya ek smile, ek chhoti si madad, ya ek gift aapke aur unke beech pyaar badha sakta hai?

Sochiye, aur pehla kadam uthaiye!

---